TEKS NARASI ( Materi BDR kelas 7 semester 1 )

KD  3.1 Memahami teks narasi tentang peristiwa atau kejadian

1. Sadurunge sinau, para siswa nyiapake buku lan alat tulis. 

2. Wacanen carita sing wis disiapake Bu Guru. Carita iki wis tau diwaca para siswa.

3. Yen biyen durung ditulis, saiki tulisen bab-bab sing penting, yaiku:

     - Apa isine crita mau?

     - Ing endi panggonan kedadeane carita?

     - Sapa arane tokoh-tokoh ing carita?

     - Kepiye wateke tokoh mau?

     - Apa sing dialami para tokoh ing carita mau ?

4. Apa sing diarani tembung Saroja iku, kepiye contone ?

Yen alat tulismu wis siap ayo diwaca kanthi teliti tulisan ing ngisor iki lan tindakna petunjuk ing dhuwur mau !

TEKS NARASI 

Teks Narasi yaiku karangan utawa paragraf, sing nyritakake kedadean/ peristiwa kanthi waktu  sing runtut saka wiwitan ( awal ) nganti pungkasan ( akhir )

Wacanen teks narasi ing ngisor iki !

Telat Sekolah 

Minggu bengi, aku dolan nonton konser musik ing alun-alun karo kanca-kancaku cah papat, Dono, Joko, Andi lan Mardi. Konsere mulai jam 8 rampung jam 10. Aku lan kanca-kanca lunjak-lunjak saking senenge ngrungokake swarane musik band sing lagi nyanyi ing ndhuwur panggung. Kesel ora tak rasakne. Pokoke seneng.​ 

Jam sepuluh, konsere wis bubar. Aku lan kanca-kanca banjur leren mangan ing warung karo ngobrol-ngobrol. Ora krasa wis jam rolas bengi, langite wis peteng ndhedhet. Walah wis kewengen. Aku lali yen mau pamit karo ibu, mulih omah jam sewelas. Nanging iki wis telat sak jam. Durung mlakune. Bisa luwih iki. Mbuh piye mengko dadine yen aku wis tekan ngomah. Mungkin ibu bakal muring-muring merga aku mulih kewengen. 

Tekan ngomah, bener apa sing tak khawatirke mau. Ibuku duka lan nyeneni aku. Suwe banget aku diseneni lan diceramahi. Aku mung bisa meneng ora bisa mbantah. Iki pancen salahku. Apa maneh isuke aku kudu mlebu sekolah. Wah ....... aku banjur kelingan yen aku ana PR matematika sing durung tak garap.  

Mlebu kamar, aku langsung lungguh ing kursi, mbukak buku nggarap PR. Sakwise rampung nggarap PR, rasane ngantuk banget. Apa maneh  PR  matematika angel banget. Aku lagi rampung jam loro bengi. 

PR wis rampung, kesel  awakku lan  ngantuk mripatku. Aku ngglethak ana ing kasur. Mripatku wis kriyip-kriyip ora kuwat melek maneh. 

Dhog...dhog...dhog…. 

Swara iku banter banget. Mripatku isih abot rasane arep melek. Nanging swara iku aku kenal banget. “Gus.. Agus.. tangi le.. wis awan!” Iku swarane ibuku. Ibu nyeluki aku, ngongkon tangi. Tak bukak HP ku, tak delok jam, wadhuh…. 

Wis jam 7 esuk. Telat aku. Maneh, aku diseneni ibuku merga tangi kawanen lan telat sekolah. Ing sekolah, aku kena hukuman ora oleh melu pelajaran pertama.

                                                

Sumber: ‘Contoh Paragraf Narasi Bahasa Jawa Tentang Pengalaman Pribadi’, Jawalogger

 

Ing wacan narasi duwur, ana tembung kang katulis miring ‘peteng ndhedhet’ , tembung kuwi sing digolongake  tembung Saroja.

Tembung Saroja yaiku tembung loro sing padha tegese utawa meh padha tegese tapi  dienggo bareng-bareng. Tembung saroja iki akeh dienggo ing pacelathon saben dina, tapi  wong sing nganggo akeh sing ora ngerti yen sing diucapake iku tembung saroja. Contone tembung saroja liyane akeh banget,  kaya ta:

adiluhung                                              

colong jupuk                                                 

akal budi                                                

edi peni

andhap asor                                            

gagah prakosa

angkara murka                                        

gandhes luwes

angkat junjung                                        

gemah ripah

arum wangi                                             

gotong royong

ayem tentrem                                          

gulung koming

babak bundhas                                        

iguh pratikel

babak belur                                            

 jalma manungsa

bagas waras                                           

 japa mantra

bobot timbang                                        

kanca batir

sopan santun

tata krama

lan liya-liyane  

 

 Tuladhane ukara ( kalimat ) sing nganggo Tembung Saroja  yaiku :

1. Taman iki ambune arum wangi amarga akeh kembang-kembang padha mekar.    

2. Copet kuwi awake babak bundhas diantemi wong sakpasar. 

3. Muga-muga awake dhewe kabeh diparingi bagas waras.       

Yen wis rampung sinau lan nyatheti sing penting-penting, para siswa bisa nggarap latihan soale.  Aja grusa-grusu, digarap sing teliti lan ati-ati supaya hasile luwih apik.

Kanggo bahan latihan soal  klik link ing ngisor iki:

https://forms.gle/FKYTfRQgGWVawt4b8

Kanggo Ulangan Harian  klik link  iki:

https://forms.gle/zJLmRHQhDB33PTCX9

4.1. Menulis ringkasan teks narasi tentang peristiwa atau kejadian

                   Para siswa isih kelingan karo crita “Telat Sekolah” ya? Yen isih durung paham critane bisa diwaca maneh bacaane ing dhuwur kuwi.

            Sawise kelingan isi crita mau, terus gawenen ringkesan tapi nganggo basamu dhewe, basa Pemalangan. Jenenge ringkesan, tegese crita sing dawa digawe luwih cekak/ringkes tapi ora ngowahi ( tidak mengubah ) isine wacan. Dadi aja ditulis maneh padha dawane. Kudu luwih cekak! Intine bae. Aja lali unsur-unsur carita kaya: jenenge tokoh, panggonane, peristiwane, aja diilangi. Dadi ringkes tapi tetep ora ngilangi unsur-unsur mau.

            Yen wis rampung olehe ngringkes, hasile garapanmu mau difoto lan diunggah kaya prentahe Bu Guru.