PIDATO

 

3.1 Menelaah Teks Pidato 

Indikator :

3.3.1        Mengidentifikasi struktur pidato.

3.3.2        Menjawab pertanyaan tentang isi pidato.

3.3.3        Mengungkapkan isi wacana pidato secara tertulis

Siapake buku lan alat tulismu. Materi pidato ing ngisor iki tulis ing bukumu!

A. Jinise Sesorah        

Sesorah mujudake sawijining cara kanggo menehi informasi marang masyarakat utawa wong akeh. Utawa uga lumrah disebut pidato.

Sesorah bisa dibedakake manut tujuane lan carane. 

Manut tujuane, sesorah bisa dibedakake :

1. Sesorah Informatif         =    tujuane kanggo nambah kawruh/pengetahuan marang pamiyarsa.

2. Sesorah Argumentatif    =   tujuane kanggo ngyakinake pamiyarsa ngenani sawijining     panemu.

3. Sesorah Persuasif     =  tujuane golek pengaruh supaya pamiyarsa gelem nindakake apa isine sesorah.

4. Sesorah Deskripsif   =  tujuane kanggo nggambarake sawijining prastawa / kaanan marang pamiyarsa.

5. Sesorah Rekreatif         =    tujuane kanggo aweh panglipur/hiburan  marang pamiyarsa.

     

 Sesorah bisa diaturake kanthi 4 cara, yaiku :

1.    Spontan ( impromptu ),  Pamedhar sabda (wong sing pidato) nindakake kanthi spontan / langsung.

2.    Apalan, sadurunge sesorah, pamedhar sabda wis nyiapake naskah lan ngapalake    tetembungane.

3.    Maca teks, anggone nindakake sesorah, pamedhar sabda maca teks.

4.  Ekstemporan, nalika sesorah, pamedhar sabda mung nggawa cathetan cilik isi pokok –   pokoking rembug sing arep diandharake kanthi ringkes.

 

          Teks Sesorah ngisor iki gatekna!

Assalamu’alaikum Wr. Wb.

Bapak Dwija Linuwih, minangka Kepala SMPN 10 ingkang kula mulyakaken
Bapak/Ibu guru sarta karyawan SMAN 10 ingkang kula hormati,
sarta para kanca siswa SMPN 10 ingkang kula tresnani.

Langkung rumiyin, sumangga kita sedaya sesarengan ngonjukaken puji syukur wonten ngarsanipun Gusti Allah SWT ingkang sampun paring pinten-pinten kabagyan, kanikmatan, saengga kita sedaya saged kempal ing aula SMPN 10 kanthi rahayu, pinaringan bagas waras, boten kirang setunggal menapa.

Para Bapak, Ibu, tuwin para tamu sedaya, kula minangka sesulih para kanca kelas IX , boten kesupen ngambali atur sugeng rawuh saha matur nuwun, dene sampun kersa ngrawuhi pepanggihan menika.

Kejawi menika, kula ugi matur nuwun dhumateng Bapak Kepala SMPN 10 ingkang sampun kersa nampi sarta ngampili sadaya sarana, ubarampe tuwin samudayanipun kangge lancaripun pepanggihan menika. Mugi-mugi kesaenanipun  pikantuk piwales saking Gusti Ingkang Maha Asih. Aamiin.

Bapak Ibu Guru,  ingkang angka sepisan,  kula lan para kanca siswa kelas IX ngaturaken agunging panuwun dhumateng Gusti Ingkang Maha Rahim ingkang sampun paring pitulungan ngantos para kanca siswa kelas IX ing taun menika saged lulus sedaya 100%.

Dene ingkang angka kalih, kula minangka sesulihipun para kanca matur nuwun sanget dhumateng para Bapak saha Ibu Guru ingkang sampun kersa maringi piwulang, ilmu, wewarah, tuwin pitedah ingkang murakabi sanget. Sih katresnanipun Bapak saha Ibu Guru dhumateng kula sakanca menika wau mugi pikantuk piwales saking Gusti Ingkang Maha Asih.

Ingkang kaping tiga, kula ngrumaosi bilih kula sakanca rumiyin asring nakal, boten manut, nglanggar peraturan sekolah, lan sanes-sanesipun. Sadaya wau temtu damel jengkelipun Bapak Ibu Guru.  Pramila kula sedaya  nyuwun Bapak/Ibu Guru kersa paring  pangaksama.

Bapak Ibu mekaten ingkang saged kula aturaken. Boten langkung kula sakanca ugi tansah nyuwun tambahing pangestu mugi saged nglajengaken wonten sekolah lanjutan ingkang kula idham-idhamaken. Ing wasana cekap semanten atur kula, bilih wonten kekirangan sarta kalepatanipun kula pribadhi nyuwun pangapunten.

Akhirul kalam, Wabilahiitaufiq wal hidayah…

Wassalamu’alaikum Wr.Wb.

 Tembung angel:

1. kempal     : kumpul
2. rahayu      : slamet
3. kesupen    : lali
4. ngambali  : mbaleni
5. sesulih      : wakil
6. pepanggihan  : pertemuan
7. ubarampe  : perlengkapan
8. pitedah      : pituduh/petunjuk
9. migunani   : maedahi/berguna
10. pangaksama   : pangapura

Perangan/ bagian Sesorah 

A.        Pambuka

1.       Salam Pambuka

Isine ngucapake salam marang para rawuh/tamu, minangka tandha sapa aruh lan pakurmatan. Kawiwitan tembung  salam.

2.       Atur Pakurmatan/Sesebutan

           Isine ngaturake pakurmatan marang para rawuh manut keadaane (sesorahe ing endi, sekolah/                kelurahan/  organisasi/ lan liyane) biasane wiwit saka sing paling dhuwur kalungguhane (jabatane).

3.       Atur Pamuji

Isine muji syukur lan panuwun marang Gusti Allah sing wis paring kesehatan, kenikmatan lan panyuwun supaya adicara kang ditindakake bisa lancar, ora ana alangan saka wiwitan nganti rampung.

B.    Isi/wigatining sesorah

Ngaturake apa tujuane sesorah. Tuladha adicara pepisahan siswa kelas IX, pengetan dina Kartini, ceramah bab kabudayan, agama, politik lan sosial utawa liyane. Isi sesorah mujudake intine sesorah.

C. Panutup

1. Dudutan/Simpulan

    Isine bab dudutan/simpulan isine sesorah.

2. Pangarep-arep/harapan

Nyuwun donga pangestu marang para rawuh/tamu supaya apa kang dadi gegayuhane (cita-cita) bisa kaleksanan. Tuladha: sing lulus sekolah bisa oleh gawean, sing ulang taun (ambal warsa) bisa lancar sekolahe, sing dadi manten bisa tentrem anggone mbangun bale wisma, ceramah apa kang diandharake/diterangke migunani marang para tamu/rawuh.

3. Njaluk Pangapura

Isine nyuwun pangapura marang para rawuh mbok menawa anggone sesorah/pidato ana kaluputan ing bab basa lan tindak tanduk. Sesorah biasane dipungkasi kanthi salam utawa nuwun/matur nuwun.

 

TUGAS SISWA

Sawise materi ing dhuwur ditulis ing bukumu, soal-soal ing ngisor iki tulis lan garapen dhisik        ing bukumu!

1.  Sapa sing sesorah/pidato  ing teks dhuwur mau!
2. Sesorah ing dhuwur diaturake ing acara apa?
3. Sapa wae sing diaturi pakurmatan ing sesorah mau?
4. Kenangapa wong sing sesorah ngaturake puji syukur marang Gusti Allah?
5. Kula minangka sesulih para kanca kelas IX. Apa tegese tembung "sesulih" ?
6. Ing poin ka-loro (angka loro) saka pidato mau apa sing diomongake?
7. Kenangapa wong sing sesorah njaluk pangapura marang bapak ibu guru?
8. Apa bae intine ing bagian panutup sesorah?
9. Apa pengarep-arepe wong sing sesorah?
10. Apa piwulang sing bisa dijukuk saka isine pidato mau?

3.